இந்திய குடிமகனின் குறைந்தபட்ச ஊதியம் 375 ரூபாய்: வல்லுநர் குழு பரிந்துரை

நாட்டின் தனிநபரின் குறைந்தபட்ச ஊதியம் நாள் ஒன்றுக்கு ரூ.375 என நிர்ணயிக்க மத்திய அரசுக்கு வல்லுநர் குழு பரிந்துரை செய்துள்ளது.

2017ஆம் ஆண்டு ஜனவரி 17ஆம் தேதி மத்திய தொழிலாளர் மற்றும் வேலைவாய்ப்பு அமைச்சகம், அனுப் சத்பதி தலைமையில் வல்லுநர் குழுவை உருவாக்கியது. இது வி.வி. கிரி தேசிய தொழிலாளர் நிறுவனம் என பெயரிடப்பட்டது. இந்த அமைப்பு தனிநபருக்கான தேசிய குறைந்தபட்ச ஊதியத்தை நிர்ணயம் செய்ய மத்திய அரசுக்கு பரிந்துரை செய்யும்.

கடந்த ஜூலை 2018ல் முடிந்த ஓராண்டை மதிப்பிட்டு புதிய பரிந்துரையை அனுப் சத்பதி தலைமையிலான வல்லுநர் குழு மத்திய தொழிலாளர் மற்றும் வேலைவாய்ப்பு அமைச்சகத்தின் செயலாளரிடம் சமர்ப்பித்துள்ளது. அதில், தனிநபருக்கான தேசிய குறைந்தபட்ச ஊதியத்தை நாளுக்கு ரூ.375 அல்லது மாதத்திற்கு ரூ.9,750 என நிர்ணயம் செய்யுமாறு கூறியுள்ளது.

நகர்புறங்களில் வாழ்பவர்களுக்கு வருவாயில் குறிப்பிடத்தக்க தொகை வீட்டு வாடகையாக செலவாகிறது என கூறியுள்ள வல்லுநர் குழு, நகர்புறத்தில் மட்டும் தனிநபரின் குறைந்தபட்ச ஊதியத்துடன், வீட்டு வாடகை செலவாக நாளுக்கு ரூ.55 அல்லது மாதத்துக்கு ரூ.1,430 கூடுதலாக சேர்த்துக்கொள்ளலாம் எனத் தெரிவித்துள்ளது.

தேசிய அளவில் குறைந்தபட்ச ஊதியத்தை நிர்ணயம் செய்வது மட்டுமின்றி, நாட்டின் வெவ்வேறு நிலப்பரப்புகளுக்கு ஏற்பவும் சமூக, பொருளாதார மற்றும் தொழிலாளர் சந்தை ஆகியவற்றைப் பொறுத்தும் குறைந்தபட்ச ஊதியம் எவ்வாறு மாறுபடும் எனவும் தங்கள் அறிக்கையில் குறிப்பிட்டுள்ளது.

இந்தக் குழு தங்களது ஆய்வு வசதிக்காக ஐந்து பிரிவுகளை வகுத்துக்கொண்டிருக்கிறது.

அசாம், பீகார், ஜார்க்கண்ட், மத்தியப் பிரதேசம், ஒரிசா, உத்தரப் பிரதேசம் மற்றும் மேற்கு வங்கம் ஆகிய மாநிலங்களில் குறைந்தபட்ச ஊதியம் நாளுக்கு ரூ.342 அல்லது மாதத்துக்கு ரூ. 8,892.

ஆந்திரப் பிரதேசம், தெலுங்கானா, சத்தீஸ்கர், ராஜஸ்தான், ஜம்மு காஷ்மீர் மற்றும் உத்தராகண்ட் ஆகிய மாநிலங்களில் குறைந்தபட்ச ஊதியம் நாளுக்கு ரூ.380 அல்லது மாதத்துக்கு ரூ. 9,880.

குஜராத், கர்நாடகா, கேரளா, மகாராஷ்டிரா மற்றும் தமிழ்நாடு ஆகிய மாநிலங்களில் குறைந்தபட்ச ஊதியம் நாளுக்கு ரூ.414 அல்லது மாதத்துக்கு ரூ. 10,794.

டெல்லி, கோவா, ஹரியானா, இமாச்சலப் பிரதேசம் மற்றும் பஞ்சாப் ஆகிய மாநிலங்களில் குறைந்தபட்ச ஊதியம் நாளுக்கு ரூ.447 அல்லது மாதத்துக்கு ரூ. 11,622.

அருணாச்சலப் பிரதேசம், மணிப்பூர், மேகாலயா, நாகாலாந்து, சிக்கிம், மிசோரம் மற்றும் திரிபுரா ஆகிய மாநிலங்களில் குறைந்தபட்ச ஊதியம் நாளுக்கு ரூ.386 அல்லது மாதத்துக்கு ரூ. 10,036.

வல்லுநர் குழு சமர்ப்பித்த அறிக்கையை தொழிலாளர் மற்றும் வேலைவாய்ப்பு அமைச்சகம் இணையதளத்திலும் வெளியிட்டுள்ளது.

Comments are closed.