செத்த பாம்ப அடிச்சுட்டு… என்னடா பெரிய சாதனை…. இப்ப நாங்க போனா கூடத்தான் சாதிப்போம் : முஹமது யூசுப்!

மும்பை: ஆஸ்திரேலிய அணிக்கு எதிராக டெஸ்ட் தொடரில் தற்போது பாகிஸ்தான் அணி பங்கேற்றால் கூட கோப்பை வென்று சாதிக்கும் என முன்னாள் பாகிஸ்தான் கேப்டன் முஹமது யூசுப் தெரிவித்துள்ளார்.

ஆஸ்திரேலியா சென்றுள்ள இந்திய அணி 3 டி-20, 4 டெஸ்ட், 3 ஒருநாள் போட்டிகள் கொண்ட தொடரில் பங்கேற்கிறது. இதுவரை ஆஸ்திரேலிய மண்ணில் டெஸ்ட் தொடரை வெல்லாத இந்திய அணி, இம்முறை ஆஸ்திரேலிய அணியின் நட்சத்திர வீரர்களான ஸ்டீவ் ஸ்மித், டேவிட் வார்னர் இல்லாத காரணத்தால், டெஸ்ட் தொடரை கைப்பற்றும் என எதிர்பார்க்கப்பட்டது.

சரித்திர சாதனை:
அடிலெய்டில் நடந்த முதல் டெஸ்டில், இந்திய அணி வென்றது. இதற்கு பெர்த்தில் நடந்த இரண்டாவது டெஸ்டில் வெற்றி பெற்ற ஆஸ்திரேலிய அணி பதிலடி கொடுத்து தொடரை 1-1 என சமன் செய்தது. மெல்போர்னில் வரலாற்று வெற்றி பெற்ற இந்திய அணி டெஸ்ட் தொடரில் 2-1 என முன்னிலை பெற்றது.

மோசமான வானிலை:
இந்நிலையில் இரு அணிகள் மோதிய கடைசி டெஸ்ட் சிட்னியில் நடந்தது. இதில் இந்திய அணி முதல் இன்னிங்சில் 7 விக்கெட்டுக்கு 622 ரன்கள் எடுத்து ‘டிக்ளேர்’ செய்தது.

ஆஸ்திரேலிய அணி முதல் இன்னிங்சில் 300 ரன்களுக்கு ‘ஆல் அவுட்டாகி’, 31 ஆண்டுகளில் இல்லாத வகையில் சொதப்பலாக ‘பாலோ ஆன்’ பெற்றது. தொடர்ந்து இரண்டாவது இன்னிங்சை துவங்கிய ஆஸ்திரேலிய அணி இரண்டாவது இன்னிங்சில் விக்கெட் இழப்பின்றி 6 ரன்கள் எடுத்த போது நான்காவது நாள் ஆட்டம் போதிய வெளிச்சமின்மை காரணமாக முடிவுக்கு வந்தது.

71 ஆண்டு கனவு….
இந்நிலையில் கடைசி நாள் ஆட்டமும் ஒரு பந்து கூட வீசப்படாத நிலையில் ரத்து செய்யப்பட, சிட்னி டெஸ்ட் ‘டிரா’வில் முடிந்தது. இதையடுத்து இந்திய அணி, 2-1 என ஆஸ்திரேலிய மண்ணில் தனது 71 ஆண்டு கனவை நினைவாக்கி வரலாறு படைத்தது.

நாங்களும் சாதிப்போம்ல….
இந்நிலையில் ஆஸ்திரேலிய அணிக்கு எதிராக டெஸ்ட் தொடரில் தற்போது பாகிஸ்தான் அணி பங்கேற்றால் கூட கோப்பை வென்று சாதிக்கும் என முன்னாள் பாகிஸ்தான் கேப்டன் முஹமது யூசுப் தெரிவித்துள்ளார்.

VIrat Kohli இதுகுறித்து முஹமது யூசுப் கூறுகையில், ‘ஆஸ்திரேலியாவில் இந்திய அணி சாதித்தது மிகப்பெரிய சாதனை. ஆனால் அதேநேரம் பாகிஸ்தான் அணியும் யு.ஏ.இ.,யில் நடந்த டெஸ்ட் தொரை ஆஸ்திரேலிய அணிக்கு எதிராக வென்றுள்ளது. அது தான் தற்போதுள்ள ஆஸ்திரேலிய அணியின் பலம்.

என்னைப்பொறுத்தவரையில் ஆஸ்திரேலிய அணியை ஒப்பிடும் போது, இந்தியா, பாகிஸ்தான் இரு அணிகளுமே தற்போது பலமான அணிகள் தான். தற்போது ஆஸ்திரேலியா சுற்றுப்பயணம் மேற்கொண்டால், பாகிஸ்தான் அணியும் தொடரை வென்று வரலாறு படைக்கும்.’ என்றார்.