Virat Kohli:கிரிகெட் குழு நிர்வாகம் பிசிசிஐ பதிலுக்கு காத்திருக்கிறது- கோஹ்லி

ஹர்திக் பாண்டியா, கே.எஸ்.ராகுல் ஆகியோர் தனியார் நிகழ்ச்சியில் பெண்களை இழிவுபடுத்தியதால் 2 போட்டிகளில் விளையாட தடை விதிக்க பிசிசிஐ பரிசீலிக்கிறது. குழு நிர்வாகம் பிசிசிஐ-ன் பதிலுக்காகக் காத்துக்கொண்டிருக்கிறது என விராட் கோஹ்லி தகவல் அளித்துள்ளார்.

இந்திய கிரிக்கெட் ஆல் ரவுண்டர் ஹர்திக் பாண்டியா கே.எஸ்.ராகுல் ஆகியோர் காபி வித் கரண் என்கிற தனியார் தொலைக்காட்சி நிகழ்ச்சியில் பெண்களை இழிவுபடுத்தியதாகக் குற்றம் சாட்டப்பட்டுள்ளனர்.

பெண்களின் வாழ்க்கைமுறை மற்றும் இனவெறியைத் தூண்டுதல் உள்ளிட்டவை குறித்து சர்ச்சைக்குரிய வகையில் பதிலளித்தனர். இதனால், அவர்கள் இருவரும் கடுமையான விமர்சனங்களுக்கு ஆளாகினர். இதனை அடுத்து, தனது தவறுக்கு ஆல்ரவுண்டர் ஹர்திக் பாண்டியா டுவிட்டரில் மன்னிப்பு கேட்டார்.

காஃபி வித் கரண் நிகழ்ச்சியில் நான் கூறிய கருத்துக்கள் எந்த வகையிலாவது காயப்படுத்தி இருந்தால், அனைவரிடமும் மன்னிப்பு கேட்டுக்கொள்கிறேன். எந்தவொரு வகையிலும் யாருடைய உணர்ச்சியையும் காயப்படுத்த நினைக்கவில்லை” என்று அவர் ட்விட்டரில் கூறியிருந்தார்.

இந்த விவாகாரம் குறித்து 24 மணி நேரத்துக்குள் விளக்கம் அளிக்க வேண்டும் என இந்திய கிரிக்கெட் வாரியம் (பிசிசிஐ) நோட்டீஸ் அனுப்பி இருந்தது. இந்நிலையில், இருவருக்கும் 2 போட்டிகளில் விளையாடத் தடைவிதிக்க திட்டமிட்டுள்ளதாக பிசிசிஐ நிர்வாகக்குழு தலைவர் வினோத் ராய் தெரிவித்துள்ளார்.

“நிகழ்ச்சியில் இரு வீரர்கள் கூறிய கருத்துக்களை இன்றைய பத்திரிகைகளில் நான் பார்த்தேன். இவர்களை மன்னிக்க முடியாது. நான் நிகழ்ச்சியைப் பார்க்கவில்லை என்பதால் தண்டனையை பரிந்துரைக்க நிர்வாகக்குழு உறுப்பினர் டயானவிடம் கூறியுள்ளேன். இருவருக்கும் இரண்டு போட்டிகளில் விளையாட தடை கொடுக்கப்படும் என நான் நினைக்கிறேன்” என்று அவர் கூறியுள்ளார்.

தடைவிதிக்கப்பட்டால், இருவரும் ஆஸ்திரேலிய அணிக்கு எதிரான முதல் 2 ஒருநாள் போட்டிகளில் பங்கேற்க முடியாத நிலை ஏற்படும். ஜனவரி 12 அன்று தொடங்கவிருக்கு ஆஸ்திரேலியாவுக்கு எதிரான 3 போட்டிகளில் பாண்ட்யா மற்றும் ராகுல் பங்கேற்க உள்ளனர்.

இதில் இரண்டு மேட்ச்களில் பாண்ட்யா கலந்துகொள்ளத் தடை விதிக்க பிசிசிஐ பேச்சுவார்த்தை நடத்தி வருகிறது. இந்நிலையில் இச்சம்பவம் குறித்து கோஹ்லி பத்திரிகையாளர் சந்திப்பில் பேட்டியளித்தார். அப்போது, குழு நிர்வாகம் பிசிசிஐ-ன் பதிலுக்காகக் காத்துக்கொண்டிருக்கிறது என கோஹ்லி தகவல் அளித்துள்ளார்.